NAKKUTILLIISOQ

Aasianni nakkutilliisutut suleqatissarsiorpugut.

Nakkutilliisutut atorfimmi inissialerisutut suleqatinut inissianillu allaffissuussisunut suleqateqarneq aqqutigalugu Aasianni Kangaatsiamilu najugaqarfiit immikkoortortaasa ulluinnarni ingerlanneqarnerat aserfallatsaaliorneqarnissaallu akisussaaffigissavatit.

Pingaarnertut suliassaraatit najugaqarfiup ingerlanneqarnera, najugaqartunik sullissineq allaffissuunneqarneralu. Akisussaaffigalugit:

• Attartortittakkat nakkutigalugit qanorlu inneri nalilertarlugit
• Pilersaarusiorneq aamma inissianik iluarsartuussinermi nakkutilliineq
• Sanasut suliaqartitassat inniminnerlugit suliaalu nakkutigalugit
• Attartortittakkat iserterfigineqalerpata qimanneqarpatalu misissorlugit
• Aningaasatigut aqutsineq, fakturat akuerisarlugit, missingersuusiorneq/nakkutilliineq
• Attartukkanik attartorunnaartitsinernik suliaqarneq
• Suliassat tamalaat

Pitsaassuseqartumik akisussaassuseqartumillu pimoorussineq suliassap suunera apeqqutaatinnagu

Tulluuttumik teknikkemut inuussutissarsiornermulluunniit tungasumik ilinniagaqarsimassaatit ukiunilu arlalinni misilittagaqarlutit, inissianik aserfallatsaaliuinissamik ilisimasaqarluassaatit, iluarsartuussisoqarlunilu aserfallatsaaliuisoqassatillugu suliarinnittussarsiuussinissamut aamma ilisimasaqassallutit. Makkua piginnaaneqarfigissavatit:

• Allaffissuussinermut piginnaaneqarneq ulluinnarnilu MS Office atorsinnaassallugu
• Pilersaarusiorsinnaassaatit, ulluinnarnilu sulianik nangitsillutit ingerlatitseqqiisarninni ilusilersuillutit
• Nakkutiginnilluarsinaassaatit killigitinneqartunullu angummassinnaallutit- aamma piffinni unammillernartuni

Pingaaruteqarpoq najugaqartut oqaasii atorlugit attaveqatigissinnaaneq, tassaasut kalaallisut/ qallunaatullu.

Suliffeqarfik pilerinartoq

Ataavartumik suliffeqarfitsinni pilerinarsaaruteqartarpugut, soorlu immikkut sulinngiffeqarfissiilluta, qasujaallisarnernut peqqinnissakkullu sillimasiinernut tapiissuteqartarluta.

2026-mi piareersaatitut sammivarput sulinermik sivikillisaanissarput, sap.ak. sulisarnissaq akunnerit 37-iinnanngorlutik.

INI-mi piginnaanngorsaanissanut ukkissisorujussuuvugut pimoorussilluta taamaattumik neqeroorutigaarput suliffeqarfik sulinikkut inuttullu ineriartornissamut periarfissiisoq.

Suliffeqarfik neqerooruterput sulisoqarpoq suliffimminnik iluarisimaarinnittunik. Sulisutta akornanni nuannersumik silaannaqarnissaa pingaartipparput akimortumillu suleqatigiittoqarluartarnissaa.

Naleqartitagut ukkassagut: Akisussaaffeqarneq, pimoorussisuunissaq, ataqqinnittuunissaq, pikkorissuunissaq.

Atorfininnermi atugassarititaasut:

Piginnaanitit aallaavigalugit akissarsiaqartitaallutillu atorfinitsitaassaatit. Atorfininninnut atatillugu nuunnissat pigisavillu assartuunnissai pisinnaatitaaffigaatit. Malittarisassat malillugit inissaqartitsisoqarsinnaavoq. 

Sulilernissaq:

Isumaqatigiissutaasoq aallaavigalugu.

Atorfik soqutigaaguk?

Atorfik pillugu annerusumik paasisaqarsinnaavutit Ingerlatsinermi Aqutsisoq Brian Grønvold attavigalugu uunga 94 60 51 imaluunniit mailimut bgr@ini.gl

Qinnuteqaatit CV-it pappilissallu attuumassuteqarsinnasut allakkatigut mailikkulluunniit tigoreersimassavagut 30. apriili 2026.

INI A/S

HR-afdelingen

Postboks 1020

3911 Sisimiut